沙聲的日子之看完醫生後......

31/5終於睇醫生，佢問完我由幾時開始等等嘅問題之後，醫生就用內窺鏡由鼻插入喉嚨，當佢由螢光幕見到我嘅聲帶嘅時候，佢就證實係有粒息肉响聲帶，令我沙聲....

呢個照內窺鏡嘅過程有啲辛苦，首先噴麻醉劑，唔係噴喉嚨，係噴鼻﹗好刺鼻呀﹗又有啲苦喎，之後佢就用一支黑色嘅管開始由我個鼻插入喉嚨，嗰條黑色嘅管，個頭有光，原來係鏡頭，亞醫生重叫我睇住個大螢幕，咁我就覺得好似睇緊ER或者鏗鏘集，但係螢幕映出嚟嗰啲器官係我個囉﹗真係有啲驚﹗首先見到嘅梗係鼻毛啦，放大咁多倍，好粗好粗呀﹗黑忟忟，咦......  跟住去到我嘅鼻膜，亞醫生一睇就知我有鼻敏感，之後我都唔知係邊到，醫生就話：嗱，呢到就係你嘅聲帶喇。吓.....哦.....都唔係我諗咁樣嘅，原來係似一個"V"字嘅器官，你講嘢呀，吞口水就會合埋，就係因為我有一粒息肉响到，唔能夠合埋哂，所以變成沙聲......

睇完之後，醫生話可以做手術切除，係一個十幾分鐘嘅小手術，不過要全身麻醉，吓....咁大鑊﹗唔好啩﹖﹗醫生見我面有難色，就見議我不如見吓言語治療師教我講嘢同點樣用氣先，响呢段期間要休息多啲，飲多啲水，唔好食煎炸嘢，一個月後再照多一次，都有50%好番。我梗係選擇後者啦。

真係有啲Sad，我開始諗，咁我咪唔可以再唱歌囉﹖諗到呢到........個鼻開始好酸....好酸......
第一時間打電話比七公話比佢聽，佢話我應該要感恩，因為只係息肉嘅問題.........唉......我都知.....
但係一時間好難去接受一個好想唱歌，但係唱唔到嘅我......

神呀﹗救救我吧﹗

沙聲的日子

從四月頭嘅培靈營到而家都已經有一個多月嘅時間，但係我把聲就沙到而家。有一日亞七反問自己，點解响呢件事上，無發過一次脾氣或顯出唔耐煩﹖鐘意唱歌嘅亞七應該會好忟至係，但又真係無乜唔開心喎﹗

其實，响2005年亞七去完"訪韓"之後，都沙聲咗一個月，以為唔洗睇醫生，唔講咁多嘢，飲多啲水，應該OK。但結果一個月後，我都係去咗睇，重記得當時食咗葯就無事。但今次我未到一個月已經去睇生，但係都係唔得，結果係31/5要去睇耳鼻喉科，再深入啲去了解乜嘢事。

當亞七問自己同神點解無唔開心嘅時候，我想起一件事．．．．．．响幾年前，亞七唔舒服失聲，返教會敬拜唱唔到歌有啲唔開心，但就喺嗰一刻，神問："亞七，你係鐘意唱歌，所以聽到音樂就即刻唱，定係真係敬拜我呢﹖你無聲唱歌唔代表你唔可以嚟敬拜我，反而比自己一個空間去思想歌詞嘅內容，比一個時間去聽其他人嘅歌聲，我都會好喜悅﹗"

記返起呢件事，我要再一次調較自己嘅角色，亞七點唱歌叻都好，都要去感恩，要再謙卑响神裏面。

安靜......等候......我想呢個就係我無發脾氣嘅原因......

希望神比我响24/6之前好番，因為我要做詩班。

切切禱告﹗

寫Blog有乜好﹖

近期五姨問我：寫Blog有乜好﹖點解時下嘅人都鐘意寫Blog呢﹖然後下咗一個評語：啲人就嚟唔識點用個口表達自己﹗

你又點睇呢﹖亞七寫Blog嘅原因，係因為：

1) 開始寫Blog嘅時候，啱啱學咗倉頡，咁就要練習一下囉；
2) 由細到大都喜歡寫作，或者係老作啦﹗ Blog，只不過給我一個空間發表發表；
3) 亞七都係一個不大喜歡說出感受嘅人，唔開心嘅時候，唔會講任何嘢，七公點氹我都唔會講有乜嘢令我唔開心，攪到七公束手無策﹗但係你叫亞七寫就無問題，所以家下我唔開心，有時都會寫封信比七公架﹗
4) 當個Blog係日記囉，可以做個紀念嘛﹗

咁，係唔係我哋就嚟唔識用把口去表達自己呢.............

除咗食、飲、講人哋是非、鬧交之外，亞七希望把口能夠唱歌讚美神，講一啲造就人、可以安慰人嘅說話，重有，同家人分享自己嘅事，同朋友一齊風花說月，同七公講小秘密......

最後，我唔希望因為我寫Blog, 我把口會變癈.......

上得山多終遇茄

上山食晏嘅原因，係因為山腰啲嘢食，越嚟越無新意又起價，所以間唔中我都會上山食，雖然要行一段幾長嘅路，但係真係好食啲同抵啲﹗最得我歡心嘅係幾個月前推出嘅"鮮茄肉片湯河"﹗鍾意嘅原因：

1) 好抵食，大大碗但只買十六個大洋﹗
2) 新鮮番茄切到細細粒，容易食，又無加糖，酸酸地，夏天食真係好醒胃﹗
3) 一大碗有齊肉、菜、蔬果同粉，營養十足呀﹗

除咗肉片之外，重有肥牛選擇，不過就要二十個大洋，無法啦，肥牛貴啲嘛﹗

其他推介有：

1) 大大粒魚肉燒賣，五個大洋，真係好大粒﹗
2) 大大杯紅豆冰，只買三個大洋﹗正﹗夏天必食﹗
3) 木桶豆腐花，都係買三個大洋，無乜特別，但勝在山腳山腰都無得食，獨家發售﹗

晏 — 好重要架，因為下晝有無精神工作就靠佢喇﹗哈哈﹗

小可愛

星期六 (12/5/07) 到咗公主屋企玩，除了因為玩駙馬新買嘅Wii之外，最重要是看看快5個月的溫小B﹗哈哈﹗沒有見3個月，大隻咗，可愛咗，重開始講說話，超可愛﹗我覺得每個BB都係安琪兒，雖然佢哋會喊，會疴臭臭，但係見到佢哋一日一日咁長大，真係好開心﹗七公：我都要生一個可愛的小七呀﹗

去到公主屋企，無停過食呀﹗有公主嘅皇家金菇牛肉卷、駙馬嘅皇家墨魚丸、珍姨嘅鎮江骨，重有新鮮茄汁燴意粉﹗喺呢到多謝公主同駙馬嘅款待﹗真係好味架﹗

 

為家人爭戰禱告

萬軍之耶和華：

我要宣告：你是黎家之主﹗你是黎家的王﹗除了你沒有別的神可以幫助我們﹗求你憐憫我們﹗我要奉主耶穌的名叫那惡者離開﹗不要在奶奶、老爺、家姐及老公的耳邊說謊話﹗撒旦你退去吧﹗奉主耶穌的名吩咐你離開﹗主啊﹗求你將恩惠傾倒在這個家每一個角落，求你赦免我們的罪，用你的血塗抹我們的過犯，願“當信主耶穌，你和你一家都必得救”這句應許，切切實實的臨到我們的家人。父啊﹗我又求你釋放我們，因為我們被金錢所捆綁﹗我奉主耶穌的名去釋放我們的心﹗不要再被金錢迷惑﹗主啊﹗幫助我們﹗因為我們不能自救，我們再沒有能力對付﹗我呼求你﹗我呼求你﹗求你快快幫助我們﹗我們就像在浮沙一樣，快被浮沙掩死，當家人想拉在浮沙中的人後，自己也不能脫離那浮沙，一個一個，以為自己可以救他，但想不到連自己也踏入了這陷阱﹗唯有你﹗唯有你﹗求你伸出恩手，用愛拉起我們，用你的愛帶我們到那平安的青草溪水旁﹗主啊﹗求你的愛大大的澆灌在這個家中，因為愛才能讓我們不畏懼，愛才讓我們脫離死亡﹗主啊﹗我再一次宣告：你是黎家的主﹗從今時直到永遠﹗

奉主耶穌得勝的名字祈求，阿門﹗