小禮物

咁日同七公一齊行返屋企，七公話有禮物送比我，不過要上去攞。我諗咗好耐，都唔知"上去"即係邊到，亦唔知佢送乜比我。直至返到屋企我去沖涼嘅時候，有人打電話比佢，之後就話要出一出去攞禮物，哦﹗我知喇﹗原來係去大佬到攞禮物......

大佬同大嫂住响第二座，佢哋啱啱去完日本，一定係七公叫佢買啲嘢送比我啦﹗唔知係咩呢﹖亞七沖完涼都重未返，唔通打舖機先返嚟﹖正當亞七盤算之際，七公返嚟喇﹗登登登登........原來係.....

七公話：你記唔記得退修嗰日夜晚，亞Mei係咁問你日本邊隻牌子護膚品好呀﹖係我請佢問你，等我可以同大佬講買乜比你嘛﹗不過你講嘅Fancl亞嫂話太貴喇，所以亞嫂幫我買咗呢樣比你囉﹗你唔記得我要去攞錢咩﹖

係呀﹗亞七好開心好感動呀﹗唔係禮物嘅大小同價值，而係七公嘅心思同心意﹗七公，我會好好記住你對我嘅好，多謝你﹗

71

2007年7月1日，回歸十週年，大日子大日子﹗愛港愛國嘅亞七都希望將來嘅十年，香港乜都好﹗
至於個人嚟講，7月1日對於亞七都係一個大日子﹗因為亞七把聲可以唱歌喇﹗哈哈﹗

 哈利路亞﹗

咁啱係星期日，當天我係返崇拜，長老帶我哋唱一首"以便以謝"，"以便以謝"係出喺撒母耳記上7章12節，"撒母耳將塊頭立在米斯巴和善的中間，給頭起名叫以便以謝，說："到如今耶和華都幫助我們。""
而呢首歌嘅歌詞係：
            

以便以謝，到如今耶和華都幫助我們。
            以便以謝，到如今耶和華都幫助我們。
            以便以謝，到如今耶和華都幫助我們。
            以便以謝，到如今耶和華都幫助我們。
            祂是創造天地的主，在祂豈有難成的事，
            來投靠祂，不要懼怕，看祂為你成就大事。

我一唱就開始喊，因為我好耐都無聽過自己唱歌，而且呢首歌嘅歌詞都好打動到我﹗無錯﹗我嘅神係創天造地嗰一位，喺佢眼中有乜嘢係做唔到﹖我把聲又算得啲乜﹖只要我呼求佢，佢就喺我生命成就大事﹗哈利路亞感謝主﹗之後我喊，係因為我嘅神真係好勁呀﹗佢真係好愛我﹗我好感動...

 唱完呢首歌之後，長老帶我哋唱"惟有主愛充滿在我心"，哎呀﹗我終於可以唱到最高嗰粒音﹗實在係太感動喇﹗不過我都無以前唱得咁放喇，有啲位我都唔唱比把聲休息吓，話哂真係有粒息肉响到，我都唔敢咁放肆，我為咗以後可以唱歌，我真係要好好保養把聲﹗

由於2號放假，我哋教會嘅一班領袖下午就去咗摩星嶺

http://www.yha.org.hk/ChiTra-HostelMountDavis.html退修。成個星期都落雨，好彩去到都係多雲啫﹗感謝主﹗嘩﹗無敵大海景，可以遠眺青馬大橋同大嶼山，不過就唔係幾睇到中環，即係無得睇煙花囉﹗不過咁，我哋去到無幾耐，有一架直升機飛過，咦，佢吊住啲嘢喎，睇真啲﹗哦﹗原來係香港十週年呀﹗

我哋一齊靈修，一齊分享，重一齊食飯，真係好似一家人﹗而福哥講咗兩篇道，令我覺得自己要起嚟，唔可以咁懶惰喇﹗我要回應主嘅愛﹗所以我第一時間決定咗，我唔再搭元朗校巴，我要响火車到睇多啲屬靈書籍，而且我要有機會就要去傳福音﹗識亞七嘅人都知我响呢樣唔係做得咁好，因為我都係一個比較被動嘅人，但係我真係好希望亞七嘅所有朋友都知道亞七信啲乜﹗你知道亞七信耶穌係唔夠架，咁信耶穌啲乜嘢先得架﹗咁啦﹗係朋友嘅都入去呢到

http://www.hkccc.org/flash2.htm睇吓啦﹗因為亞七真係好想話比大家聽，耶穌唔單止愛我，重好愛你哋架﹗重有，你哋無論有乜事，你講比我知，我一定會為你代禱﹗

朋友，基督徒咁鐘意同人講耶穌，唔係因為你信咗之後有錢分或者有乜著數，而係好想話比大家聽，我哋嘅神，真係好好﹗好到要話比全世界聽，咁你咪聽吓係咪真係咁好囉﹗

保你大聚會

30/6/07 同"保你大"同學聚會，地點係尖沙咀嘅Rice Peper。7:00到達，已經見到蕉姐响入面，一個何其清爽嘅髮型呀﹗七公就話蕉姐似日本妹，我都覺得似呀﹗一路吹水一路等其他人，之後佢哋陸陸續續嚟到，其實我哋最心急嘅都係等緊佢......無錯，就係佢......溫小B﹗

溫小B又大隻咗喇，佢嗰碌腳，真係好似節瓜呀﹗哎呀﹗開始認人呀，珍姨抱佢無耐，一路眼碌碌咁望吓望吓，之後﹖當然係喊啦﹗公主即刻攞出絕招 — 大口仔，佢開始唔喊，重响珍姨嘅懷抱裡玩添﹗我哋每個人都抱過佢呀，最後輪到我喇，我都不忙叫七公幫我影多兩張相，之後溫小B開始眼瞓，最終我將小B過比珍姨，佢就好熟手咁揍咗佢瞓﹗

响上年嘅夏天，我哋一班同學慶祝十週年去咗澳門玩，當時嘅溫小B重响亞媽個肚到，七公好感慨咁講，溫小B嘅出世，正好就代表我哋踏入人生另一個階段。無錯，甚願我哋每一位同學，响呢個新嘅階段樣樣都係好﹗