勁呀﹗可愛四姨同靚靚五姨响呢個月都分別去咗日本玩，可愛四姨好大手筆咁送咗一個Blue Label袋比我，哈哈﹗
好開心﹗多謝妳呀可愛四姨﹗
另外，鍾意食嘅靚靚五姨，除咗買好多日本零食番嚟之外，今次仲買咗長腳蟹同神戶牛柳，好嘢﹗
於是乎上星期六所有人，連貓連狗就番左七媽屋企開餐﹗
其實靚靚五姨今次咁大手筆係因為七媽怕搭車搭飛機，唔會去旅行，所以靚靚五姨就將長腳蟹同神戶牛柳空運返屋企，希望七媽雖然唔去旅行，但都可以品嚐吓其他地方嘅美食。真係孝感動天﹗
時值20:00，當七哥返嚟後，就開始名符其實嘅“拆蟹”﹗咁貴買隻蟹返嚟，又咁大隻，點拆呀﹖日本人真係日本人，隻蟹係連埋一把鋒利嘅較剪、一份教你點拆蟹嘅說明書同一包點蟹肉嘅醋。幾好配套呀﹗開始開餐喇，終於明白乜嘢叫做蟹柳，正﹗實在大隻，我哋一共有十三人都食到好開心﹗
之後就到神戶牛柳，當然係好出名嘅菊水神戶，又係七哥操刀，煎比我地食，今次靚靚五姨買咗兩塊牛柳同一塊牛排，六成熟，啱啱好，入口即化，簡直人間極品﹗
就係咁，我哋就食咗成千蚊落肚，好滿足﹗但係仲有驚喜，就係七嫂 Home made Lemon Cheese Cake 同雪糕﹗
今次真係好開心，但係最開心嘅係七媽開心嘛﹗佢開心，我哋自然開心啦﹗
番工食藥又勁眼瞓，好慘﹗到最後，七媽終於忍唔住出手，煲川貝比我飲﹗
連藥水都唔多飲嘅我，今次真係慘，可以話“苦過弟弟”﹗痰呀痰，快啲遠離我啦﹗唔該.......