清遠遊記

今次清遠之旅，總括來說有點辛苦，因為搭車多過行路，可以講我們的祖國真是地大物博﹗

我們一行十一人參加了大X旅行社的清遠陽山天泉温泉渡假村，早上自己過關到皇崗上旅遊巴，早上八點準時開車。嘩﹗唔去唔知，大X旅行社就响重陽開咗過百團返大陸，我哋係97B車，成條街都係等上巴士嘅人，非常墟撼。

我哋嗰團都有45人，大大細細老老少少都有，其中一個仲係一個人自己旅行，好孤單啫﹗離開咗深圳特區，一片一片又一片嘅稻田出現在眼前，導遊話今年大豐收，今年農民過年一定好開心﹗我都好開心呀﹗不經不覺到咗中午，足足坐咗3個鐘先到清遠鳳皇城﹗當然途中司機都有喺油站停一停，比我哋去去洗手間，但係都坐到我腰骨直哂呀﹗講起洗手間，偉大祖國乜都先進，但係洗手間就......唉......

食完飯，又坐車，今次要坐2個半鐘，喺車到有乜好做，咪瞓囉﹗幾經辛苦，終於嚟到天泉温泉渡假村，天都開始黑，不過一場嚟到，都要上山睇吓有"廣東第一峰"之稱嘅陽山，仲有瀑布，旅行社嘅宣傳單話，嗰到嘅空氣，負離子係最高，一句講哂，空氣清新囉﹗唔係咁易去架，要比30個大洋﹗仲要自己行半粒鐘上山﹗雖然我甚少行山，但還可以啦﹗終於到達瀑布，嘩﹗一行上山的人大叫：回水﹗朋友可以看一看我上載的照片，自己判斷一下喇﹗空氣是否清新見仁見智，但在城市工作的我，唔係好行山的我，都可算是自己個人的小小創舉。

行落山又要半粒鐘，正所謂上山容易落山難，落到山天都黑齊，休息一陣就食晚飯。食飽飯仲有節目，當地人嘅—篝火晚會。又係要比30個大洋，不過都幾好睇啦，有跳舞、吞火、用火接觸身體、 仲有上刀山﹗好邪呀﹗好似神打﹗完場時見到玩火嗰位人兄，身上都有啲水泡，好驚﹗

睇完後就到今次旅行嘅戲肉—浸温泉﹗都ok啦，當然無珠海、中山咁好，不過心情可以影響一切，可以一家人一齊浸一浸，傾吓計，都係促進彼此感情嘅好節目﹗浸完...一身舒服哂﹗跟住瞓番個靚覺﹗

第二日主要嘅行程都係坐車啦，坐咗兩個半鐘頭後食午飯，不過今次好特別，坐船遊西江兼食飯﹗上船前七奶奶買咗三隻鵝蛋，好大隻蛋呀﹗上船喇﹗我嘅感覺係...好﹗一句講哂：I like it﹗可能天氣好啦，啲風吹埋嚟好舒服﹗可以暫時忘記香港嘅公事，人生一樂也﹗我哋開咗隻鵝蛋嚟食，蛋白透明，蛋黃好黃，好似芒果﹗好得意﹗不過味道就唔及雞蛋喇﹗

食完飯，繼續坐車啦﹗一坐又幾粒鐘，真係好辛苦﹗終於明白乜嘢叫做“舟車勞頓”。黃昏時候終於到達深圳，旅程亦結束。

其實老實講，如果唔係七奶奶話要去，我同七公都唔會自己去呢啲地方，不過七奶奶叫到，又可以同七姑奶及其他人一齊去玩，都係一個唔錯嘅旅程﹗Anyway，總之，可以同親人一齊去，咁難得，要好好珍惜﹗

有相睇，慢慢欣賞吧﹗