呢個照內窺鏡嘅過程有啲辛苦，首先噴麻醉劑，唔係噴喉嚨，係噴鼻﹗好刺鼻呀﹗又有啲苦喎，之後佢就用一支黑色嘅管開始由我個鼻插入喉嚨，嗰條黑色嘅管，個頭有光，原來係鏡頭，亞醫生重叫我睇住個大螢幕，咁我就覺得好似睇緊ER或者鏗鏘集，但係螢幕映出嚟嗰啲器官係我個囉﹗真係有啲驚﹗首先見到嘅梗係鼻毛啦，放大咁多倍，好粗好粗呀﹗黑忟忟，咦......
跟住去到我嘅鼻膜，亞醫生一睇就知我有鼻敏感，之後我都唔知係邊到，醫生就話：嗱，呢到就係你嘅聲帶喇。吓.....哦.....都唔係我諗咁樣嘅，原來係似一個"V"字嘅器官，你講嘢呀，吞口水就會合埋，就係因為我有一粒息肉响到，唔能夠合埋哂，所以變成沙聲......睇完之後，醫生話可以做手術切除，係一個十幾分鐘嘅小手術，不過要全身麻醉，吓....咁大鑊﹗唔好啩﹖﹗醫生見我面有難色，就見議我不如見吓言語治療師教我講嘢同點樣用氣先，响呢段期間要休息多啲，飲多啲水，唔好食煎炸嘢，一個月後再照多一次，都有50%好番。我梗係選擇後者啦。
真係有啲Sad，我開始諗，咁我咪唔可以再唱歌囉﹖諗到呢到........個鼻開始好酸....好酸......
第一時間打電話比七公話比佢聽，佢話我應該要感恩，因為只係息肉嘅問題.........唉......我都知.....
但係一時間好難去接受一個好想唱歌，但係唱唔到嘅我......
神呀﹗救救我吧﹗
Oh! Lo媽，我由細到大都聲沙喎！乜原來聲沙咁嚴重...... 我有個舊同事都做過呢啲手術，之後把聲會唔同咗，清脆好多，所以未必係壞事，只係短期內唱唔到歌啫！可以聽歌囉.....聽醫生話要休息多啲呀！
回覆刪除謝謝你啊乖仔，今日去做語言治療，語言治療師話我唔係咁差，我28/6去照多一次聲帶，希望到時無事啦﹗
回覆刪除嘩我唔會同你一樣掛.... 我呢個星期把聲都沙左好耐喇,總之一講野多就會沙一排,真係要睇下咩事先得喇,你家下都唔好講咁多野喇,好好咁保養把聲,我呢幾日都要好似你咁小說話多做事了.
回覆刪除