改寫我日記 5之回顧

亞七由今日開始放假，好快就見到呢個响亞七個肚到住咗咁多個月嘅住客個樣，真係有啲緊張。亞七知道之後應該好唔得閒，趁而家回顧吓先，亞七驚之後唔記得......

頭個三個月係危險期，除咗唔好亂食嘢，重有要好小心，好彩亞七响呢段期間都無乜嘔，只係反胃，食嘢唔算多，因為無乜胃口...諗起都好感恩，因為諗起以前四姨就慘，嘔到喉嚨都出血呀﹗感謝主﹗

之後嘅四五六月，踏入蜜月期，開始食多啲，最特別嘅係，開始感覺到郁動，唔知係鍾意打字定係討厭打字，亞七一打字就係咁郁，有時郁到亞七真係頂唔順，要起身行吓...不過，亞七總結一句：(普通話) 感覺良好，完畢﹗

七八九月，亞七隻腳開始腫，未曾試過一年內買咁多鞋，連Mo仔都話，你隻腳好腫喎，要為你祈禱....亞七响呢段期間買咗五對鞋，希望之後著得番之前嗰啲啦。另外，亞七變咗大食積，食好多嘢，連七公都睇唔過眼...咁亞七真係肚餓嘛.....重有嘅係，肚肚越嚟越大，有時郁真係頂到亞七個肺，令亞七抖唔到氣。手手腳腳嘅關節個痛啦，一早起身就覺得成個機械人咁呀﹗最開心可以食涷嘢﹗正﹗

七公都有定時幫亞七度吓個肚嘅....
1/3/2010 35"
18/4/2010 37.5"
25/5/2010 39"
27/6/2010 41.5"
18/7/2010 42.5"

响呢段期間，亞七出席咗三個婚禮，包括表伯表伯娘、邵Sir同Miss Li，重有珍姨同西門，真係恭喜哂﹗

最後，要多謝一班天使，妮妮姨、Mo媽Mo爸，Hannah媽、重有為亞七代禱嘅所有弟兄姊妹，因為佢哋比咗好多嘢亞七，包括佢哋啲經驗同實質嘅物品呀﹗重有好多錫亞七嘅朋友，佢哋通通都對亞七好好呢﹗多謝哂﹗另外特別鳴謝曾經讓過個位比亞七嘅街外朋友，你哋真係好呀﹗咁緊係要多謝七公啦，幫亞七做好多嘢，感謝主有七公比亞七做地上嘅最強後盾﹗

感謝天父嘅保守，多謝耶穌嘅愛護，聖靈每日嘅提醒，但願七公同亞七能將聖經嘅真理，一一傳受比下一代，一生都不偏離祢嘅道路﹗哈利路亞﹗願將榮耀頌讚一一歸給祢﹗