2006年聖誕節(1)

首先，要同主耶穌講：生日快樂﹗

聖誕節嘅四天半假期，好似倒水一樣，"Her Her" 聲過咗，今日就嚟一個回顧啦﹗

23/12/2006
上晝返工，下晝約咗七奶奶luuch同去花鳥蟲魚展買花。最攪笑係，七老爺要我哋坐佢架戰車去舊墟食豬手麵﹗聽七奶奶講，呢間豬手麵鋪仔好巴閉，每日只做早上十一點至下午三點，無冷氣，但一樣人頭湧湧﹗而我，好似咁大個女都未食過豬手嘅我，感覺係......我唔會再去多一次囉。
食完就去花鳥蟲魚展買花，一樣人山人海﹗每一年，七奶奶都會响展覽到買花過年，而且會買多一盆比我，今年我就自己揀，買咗一盆白色嘅蝴蝶蘭，好靚呀﹗多謝七奶奶﹗
之後三點幾去咗做攤位遊戲，人唔係好多，但都要排隊玩﹗

       

     


最好玩嘅係有一個吹氣滑梯，如果我係小朋友，我都去玩呀﹗不過我發覺，有家長陪同嘅小朋友，嚟我哋到玩攤位嘅都唔係好信自己個仔或個女可以入到個窿。講真，我哋個攤位好容易玩，只不過比三個波你掟入個窿，入唔入到都會"給"個印仔比小朋友換禮物，但係啲家長一埋嚟就懷疑咁問個仔個女：你得唔得架﹖唔係呢一句就係：你唔夠力，比我幫你掟啦﹗Please﹗比個仔自己玩啦﹗唔通連玩都要你幫咩﹖﹗當個仔入到就話：得喎﹗原來你都可以喎﹗Please﹗信吓自己嘅仔女啦﹗小朋友有無窮嘅精力同無窮嘅想法，唔係犯法，又唔阻到人，你比佢試吓啦﹗當日五點收擋，自己覺得好開心，因為諗起想當年，小時候每年聖誕教會都會有攤位比我哋玩，好懷念﹗仲有一次，Sunny哥哥嚟做佈道會，一齊唱歌一齊玩﹗23/12就喺懷緬中過去﹗

24/12/2006
上晝一樣返教會，開咗個聖誕Party，交換禮物唔少得啦﹗大家都好開心﹗之後立即返屋企補兩粒鐘，因為夜晚有重頭劇 ─ 報佳音﹗話比附近嘅居民聽主耶穌已經誕生﹗嘩﹗今年有好多人參加，有老有少，最細嗰個一歲都未夠。當晚好開心，返到教會重有宵夜，多謝火百合呀﹗