2006年聖誕節 (2)

25/12/2006

早上响屋企休息，下晝就去咗公主同駙馬嘅新居，地點唔講喇，睇相啦﹗

 

我最鍾意係個露台，可以曬衫，不過我同七公都唔係好敢行出去，因為公主駙馬住得太高，我同七公都有畏高，唯有响個廳到望出去啦﹗公主駙馬好客氣，整咗好多好食嘅招呼我哋呢班平民，多謝公主駙馬聖寵﹗

離開咗皇宮之後，我同七公就去咗四姨屋企開一年一度嘅Family Christmas Party，由於啲細路大個喇，我哋啲長輩都無買禮物，反而今年嘅遊戲係"一擲千金"兒童版，啲銀碼梗係細啲啦，啲錢邊個贊助﹖梗係啲長輩啦﹗好彩，當日6個細路，兩個人一組，都無抽到最高金額個箱，如果唔係，啲長輩一定"our our"聲﹗最攪笑係用 Airwaves香口膠個盒做"Banker一口價，買定唔買"嗰個制，大家都玩得好開心﹗至於食方面，由四姨新請返嚟個菲傭Rose負責，不過最出息嘅就係七嫂親自炮製嘅蛋糕﹗簡直好似响街買一樣﹗

今年聖誕真係好忙，希望下一年可以真真正正休息一下﹗