最近推介

最近亞七有三樣嘢想推介比朋友，一套漫畫、一系列紀錄片同一個比賽。

首先係一套漫畫，叫做"來自遠方"，係五姨嘅推介。五姨由細到大都鐘意睇漫畫，最鐘意係"尼羅河女兒"同"玉女百態"。"玉女百態"又即係"玻璃面具"，無記之前都有播呀﹗都幾好睇。但係五姨話呢兩套漫畫重出緊，重未有大結局。吓﹖﹗五姨，呢兩套漫畫喺我小學嘅時候你已經睇緊，家吓重未出完﹖真係奇怪.....係，講番"來自遠方"，我覺得值得推介嘅原因係：
                  1) 啲畫畫得好靚
                  2) 故事正面，真係邪不能勝正呀﹗
                  3) 有啲科幻，但係內容主題係邊一個年代都唔會變
亞七好少睇漫畫，我只係睇過IQ博士、男兒當入樽、小甜甜等等，我都係鐘意睇小說多啲，不過呢次我都有追呢一套，證明都有啲吸引力，有興趣可以去Yahoo search吓，因為我知可以响網上睇，不過我唔係好鐘意，唔响呢到寫條link比大家嘞。

另一個推介係國家地理頻道 http://www.ngc.com.tw/ 嘅"The Womb Week"，講動物同人嘅生育過程，唔止一個BB，係孖胎、三包胎、重有四包胎。亞七鐘意睇係因為亞七係女人，哈哈﹗重有係裡面嘅鏡頭可以見到唔同日子BB係媽咪肚入面嘅樣，佢哋响個肚入面做乜，重有多包胎嘅BB點樣親密，之後媽咪點樣生出嚟。真係令我好感動﹗我只能說：
我的肺腑是你所造的，我在母腹中，你已覆庇我。我要稱謝你，因我受造奇妙可畏，你的作為奇妙，這是我心深知道的。我在暗中受造，在地的深處被聯絡，那時，我的形體並不向你隱藏。我未成形的體質，你的眼早已看見了，你所定的日子，我尚未度一日，〔或作我被造的肢體尚未有其一〕你都寫在你的冊上了。神阿，你的意念向我何等寶貴，其數何等眾多。 - 詩篇139篇

最後推介係我响Youtube睇嘅台灣節目：超級星光大道，其實係一個歌唱比賽，不過水準很高，無分男女，但最後都係男仔玩哂，評審方面都係台灣嘅數一數二唱歌同創作好叻嘅人，最主要嘅評審有袁惟仁、黃韻玲、辛曉琪、張宇等等。其實參賽者裡面有一個好似後生版嘅八两金，但係把聲超好聽，但係因為佢虛報年齡而退出，佢就係超人氣嘅楊宗緯﹗可以去聽吓佢唱成點。呢個比賽另一個好奇怪嘅現象，就係好鐘意喊，男又喊女又喊，聽首歌都可以喊，我就好唔明白，真係唱得咁感人﹖至於我嘅心水推介係參賽者潘裕文同林志炫唱嘅"離人"，超好聽呀﹗得閒去Youtube睇吓啦﹗

三個推介，有無一樣啱你呀﹖