沙聲的日子之友誼萬歲及言語治療師

自從亞七寫咗 "沙聲的日子之看完醫生後......"，亞七嘅朋友、教會嘅弟兄姊妹、家人、甚至未來表嫂都送上溫暖嘅問候，喺呢到真係要多謝各位嘅關心﹗

上星期日真係好唔開心，因為當日我唔洗事奉，所以我返崇拜，敬拜嘅時候，一聽音樂我就開始喊，因為我要休息唔可以唱歌。非不為也，實不能也﹗理性上我知道神唔會介意我唱唔到唱歌，因為我知道全人嘅敬拜唔係唱吓歌咁簡單，呢個課題可以講好耐，唔响到詳細講喇，但係我嘅內心真係接受唔到唱唔到歌嘅自己。

"自己"......我思想乜我敬拜係因為自己咩﹖因為覺得自己唱歌好聽，所以要唱大聲啲﹖咁我敬拜係為乜﹖諗到呢到我就更加傷心，原來唱歌敬拜都係為自己......原來我某程度嘅價值觀都建於我唱歌好唔好......神响短短嘅敬拜時間不斷對我說話，佢話：敬拜嘅真義唔係你唱唔唱到歌，唱歌只不過係敬拜其中一種方式，你可以去聽其他人唱歌、禱告、甚至係個心到唱，只要係嗰一刻，個焦點係我﹗係，我應該去搵番敬拜嘅真正意義......

今日去睇言語治療師，經過用"文"，即係做問卷啦，同"武"，一連串要我跟佢講"aeiou"，重有睇吓我有幾長氣之後，得出嘅結果係原來我都唔係咁差，有啲音佢聽到都好清，講真，佢唔講我真係唔覺，佢一講又真係唔同其他發出嚟嘅音喎﹗ 咁我都開心啲......睇咗1粒鐘，最後佢要我飲八杯水，唔好格硬再唱歌，重有少說話，多做事啦﹗

就八杯水嚟講，今日返到公司問同事即係幾多ml呢﹖無人答到我，真係唔search yahoo 都唔得呀﹗各方好友，真係去睇吓啦﹗

http://hk.knowledge.yahoo.com/question/?qid=7007051901540

好驚飲到賴尿......