二號客運大樓及翔天廊

咁日去咗機場接五姨，七公又未到，唯有自己一個去參觀新開嘅二號客運大樓同翔天廊啦﹗

我去到機場，當然喺舊嗰面客運嘅出境大樓落車啦，都見到有啲大地圖教人點去二號，但係我睇嚟睇去，我都唔知佢寫乜喎，係我有問題，定係個地圖有問題呢﹖唉﹗算啦，去唔到算啦﹗又唔知要行幾耐，miss 咗班機接唔到五姨就大件事。之後我落咗入境大堂，check 一 check 五姨班機有無delay。唔覺意見到過路牌：二號客運大樓，吓......哦......咁我就跟住個牌嘅箭咀行喇。

唏﹗原來係好近，我行咗3分鐘，就到咗二號。其實啲路牌可以再清晰啲，我呢啲矇炳係唔明架﹗二號都好大，又無乜人，可能始終係新啦。商店都有開，啲sales都係拍烏蠅，行吓行吓，咦，係呢到都可以check in 喎，又可以出境喎。上咗電梯，就到咗翔天廊，都好多商店，但都係拍烏蠅啦，有個food court，都有人去食喎，最吸引我嘅係4-D影院，不過咁日做嘅戲我都未聽過，下次要同七公嚟睇睇﹗

一直都對機場有一種特別嘅感覺，可能經過咗青馬大橋，到咗大嶼山，雖然實質無出境，但係感覺上就好似離開咗香港咁。去深圳都無呢種感覺呀﹗做女嘅時候，有乜唔開心我都會去機場行吓，可能想逃避吓啦，見住架飛機起飛，我都好想買張機票離開香港唔再理啲唔開心事呀﹗

七公終於都嚟咗，我哋响Burger King 食晚餐，無計啦，七公好鐘意Burger King，聲沙嘅我唯有奉陪，我無食薯條呀﹗响Hall B等呀等，等呀等，都唔見五姨出嚟，我就同七公講，你估有無人每一日都喺到等佢心愛嘅人出現呢﹖可能佢哋有個誓言，有個承諾，可能有生之年會見到，但係已經面目全非........七公回我一句：你未免諗得太多﹗五姨終於出嚟，我嘅行程都結束喇﹗

http://www.hongkongairport.com/eng/skyplaza/index.htm